Úrskurður ríkisskattanefndar

Málavextir voru þeir, að skattstjóri tók framtal kæranda gjaldárið 1977 til endurálagningar og færði honum til tekna kr. 602.340,- vegna áætlaðs söluhagnaðar vegna skipta á íbúð við F-götu í Kópavogi og 50% fasteignar við T-götu í Reykjavík.

Kærandi hafði reist sambýlishús við F-götu í Kópavogi, er í voru 6 íbúðir. Fimm íbúðanna seldi kærandi fyrir kr. 18.800.000,- en eina íbúð lét hann í makaskiptum fyrir eignina við T-götu í Reykjavík og fékk að auki kr. 1.700.000,- í milligjöf. Skattstjóri áætlaði söluverð þessarar íbúðar og lagði í þeim efnum til grundvallar söluverð þeirra íbúða, sem seldar höfðu verið. Samkvæmt þessu mati skattstjóra var hagnaður af sölu íbúðarinnar kr. 602.340,-.

Af hálfu kæranda var því haldið fram, að ekki lægi fyrir, að hagnaður hefði myndast vegna skiptanna og var því mótmælt að skattstjóra væri heimilt að áætla söluhagnað í þessu tilviki.

Í úrskurði ríkisskattanefndar segir:

„Samkvæmt framtölum kæranda er megin þáttur í starfsemi hans árin 1975 og 1976 að byggja íbúðir til endursölu. Tekjur af þessari atvinnustarfsemi kæranda eru skattskyldar skv. A-lið 1. mgr. 7. gr. laga nr. 6 8/1971 sbr. upphafsákvæði greinarinnar. Kærandi byggði og seldi 6 íbúðir og fékk endurgjald kr. 20.500.000,- og að auki íbúð við T-götu í Reykjavík.

Í gögnum málsins er eigi að finna fullnægjandi upplýsingar varðandi mat á verðmæti fasteignarinnar við T-götu. Mat skattstjóra virðist þó lægra en gögn málsins gefa tilefni til, svo sem þau nú liggja fyrir.

Þykir því bera að vísa kærumáli þessu frá að svo stöddu.“