Úrskurður ríkisskattanefndar

Kærð er sú breyting skattstjóra á skattframtali kæranda árið 1980 að færa honum til tekna sem skattskyldan söluhagnað 59 948 153 kr. Söluhagnaður að fjárhæð 27 807 845 kr. féll til á árinu 1977 og neytti kærandi heimildar 11. mgr. E-liðs 1. mgr. 7. gr. laga nr. 68/ 1971, um tekjuskatt og eignarskatt, til frestunar skattlagningu hans um tvenn áramót. Söluhagnaðinn færði skattstjóri til tekna framreiknaðan með verðbreytingarstuðli 2,1558 og vísaði hann í því sambandi til ákvæðis til bráðabirgða IX í lögum nr. 40/1978, um tekjuskatt og eignarskatt, með síðari breytingum. Mótmælti kærandi því að svo beri að skilja ákvæði þetta og krefst hann þess að hinn frestaði söluhagnaður verði færður honum til tekna á skattframtali 1980 án.hækkunar vegna verðbreytingar. Aðrar kröfur eru ekki hafðar uppi í kærunni til ríkisskattanefndar.

Með bréfi dags. 7. desember 1981 féllst ríkisskattstjóri á kröfur kæranda.

Fallist er á kröfur kæranda