Úrskurður ríkisskattanefndar

Kærandi mótmælti þeirri ákvörðun skattstjóra að fella niður gjaldfærðar iðgjaldagreiðslur á rekstursreikningi árið 1977 að fjárhæð kr. 134.533 í lífeyrissjóð Verkfræðingafélags Íslands vegna eigin lífeyristryggingar og færa umrædda fjárhæð til frádráttar í gjaldahlið framtals. Kærandi, er rak sjálfstæða atvinnustarfsemi og greiddi iðgjöld til umrædds lífeyrissjóðs að öllu leyti sjálfur, færði 60% heildariðgjaldagreiðslna sinna sem hluta atvinnuveitanda til gjalda á rekstursreikningi en 40% til frádráttar í gjaldahlið framtals sem eigið framlag.

Ríkisskattanefnd komst að svofelldri niðurstöðu:

„Með vísan til 1. mgr. D-liðar 13. gr. laga nr. 68/1971, um tekjuskatt og eignarskatt, þykir bera að staðfesta úrskurð skattstjóra um þetta kæruatriði, enda innti kærandi umræddar iðgjaldsgreiðslur af höndum að öllu leyti vegna sjálfs sín.“