Úrskurður ríkisskattanefndar

Kærandi, sem var sóknarprestur í þéttbýli, kærði lækkun skattstjóra á frádrætti vegna skrifstofuhalds í húsi hans úr kr. 96.007,- í kr. 40.000,-. Samkvæmt sérkjarasamningi milli Prestafélags Íslands og fjármálaráðherra fékk hann ofangreinda upphæð sem þóknun fyrir starfsaðstöðu, sem hann lét í té embættisins vegna. Af upphæð þessari skattlagði skattstjóri kr. 56.007,- eins og áður er sagt.

Í úrskurði ríkisskattanefndar segir:

„Samkvæmt fyrrnefndu samningsákvæði er um að ræða þóknun fyrir starfsaðstöðu embættisins vegna, sem kærandi lætur í té á heimili sínu, þar með talið þau óþægindi og röskun, sem því fylgja að ætla verður. Með vísun til C-liðs 11. gr. laga nr. 68/1971 og eðlis þóknunarinnar að öðru leyti, og þess ennfremur, að gögn málsins bera ekki með sér, að greiðslan sé óeðlilega há. Þykir eiga að taka kröfu kæranda til greina.“